މިއިދާރާއަށް ގިނަ ދުވަހު ޚިދުމަތްކޮށްދެއްވާފައިވާ މުވައްޒަފު ފަރުހާދު މުޙައްމަދު ރިޓަޔަރ ކުރެއްވުން

އދ. މާމިގިލީ، ހަތިކޮޅު ފަރުހާދު މުޙައްމަދު އެންމެ ފުރަތަމަ ސަރުކާރަށް ގުޅިވަޑައިގަތީ 1 އޭޕްރިލް 1979 ވަނަ އަހަރުގައެވެ . 2004 ވަނަ އަހަރު ދިވެހިރާއްޖެއަށް ދިމާވި ހިތާމަވެރި ސުނާމީ ކާރިޘާއާއި ގުޅިގެން ސަރުކާރުން އެއްރަށުން އަނެއް ރަށަށް  މީހުން ހިޖުރަކުރުމަށް ފުރުސަތު ހުޅުވާލުމާއެކު  2005 ވަނަ އަހަރު ފަރުހާދު މުހައްމަދު ވަނީ އެރަށުގެ ރައްޔިތުންނާއެކު މިރަށަށް ހިޖުރަ ކުރައްވާފައިއެވެ.  މިއާއިއެކު އެރަށުގެ ސަރުކާރު މުވައްޒަފުންގެ ގޮތުގައި ތިއްބެވި މުވައްޒަފުން މިރަށުގެ ސަރުކާރުގެ އިދާރާތަކަށް ބަދަލު ކުރެއްވި އިރު ފަރުހާދު މުޙައްމަދު މި ކައުންސިލާ ގުޅިވަޑައިގަތީ ކުޑަކަތީބެއްގެ ހައިސިއްޔަތުންނެވެ. 2005 ވަނަ އަހަރުން ފެށިގެން  03 ނޮވެމްބަރ 2025 ވަނަ އަހަރާ ހަމައަށް މި ކައުންސިލްގައި ފަރުހާދު މުޙައްމަދު އެސިސްޓެންޓް ކައުންސިލް އެގްޒެކެޓިވް އެއްގެ ގޮތުގައި މަސައްކަތްކުރެއްވި ދިގު 20 އަހަރު ދުވަހުގެ ތެރޭގައި ފަރުހާދު މުޙައްމަދު މިކައުންސިލާއި ރަށުގެ ރައްޔިތުންނަށް އަގުނުކުރެވޭފަދަ ގިނަގުނަ ޚިދުމަތް ތަކެއް ވަނީ ކޮށްދެއްވާފައެވެ.

ދައުލަތަށް ދިގުމުއްތައް ޚިދުމަތްކޮށްފައިވާ ފަރާތްތަކަށް ރައީސުލް ޖުމްހޫރިއްޔާ ދެއްވާ އިނާމު 2024 އަހަރު ވަނީ ފަރުހާދު މުޙައްމަދަށް ލިބިވަޑައިގެންފައެވެ. 03 ނޮވެމްބަރ 2025 ވަނަ ދުވަހު ފަރުހާދު މުޙައްމަދު މި ކައުންސިލާ ވަކިވެވަޑައިގެންނެވި އިރު ވަނީ 46 އަހަރަށްވުރެން ގިނަދުވަހު ދިވެހި ދައުލަތަށް ޚިދުމަތްކޮށްދެއްވާފައެވެ.